Аҟәа. Нанҳәамза 21, 2021 шықәса. Аԥсныпресс. Аԥсны амедицинатә усбарҭақәа ирласу амедицинатә цхыраара азы иҷыдоу автомашьына ҿыцқәа хәба роураны иҟоуп, ҳәа адырра ҟаиҵеит атәыла агәабзиарахьчара аминистр Едуард Быҭба.
Аԥсны Аҳәынҭқарра Ахада иҟаиҵаз адҵа ала, Адыгеиа ԥыхьатәи Ахада, амеценат Ҳазреҭ Совмен Аԥсны иазоуижьыз аԥаратә хархәагақәа рыла иаахәоуп ирццаку амедицинатә цхыраара азы иҷыдоу автомашьынақәа ҩба.
"Амашьынақәа аахәоуп, уажәы урҭ акомплектациа иахысуеит. 10-мыш ирхымгакәа урҭ Аԥсныҟа иаагахоит», - ҳәа иҳәеит атәыла агәабзиарахьчара аминистр.
Аслан Бжьаниеи Урыстәылатәи Афедерациа Аҳәынҭқарратә Дума адепутат Адам Делимханови реиҿцәажәарақәа ирылҵшәаны, ареспублика иаураны иҟоуп ирласу амедицинатә цхырааразы даҽа ҩ-автомашьынак.
Иара убас амеценат Иван Саввиди Аԥсны ҳамҭас иаиҭеит максималла зкомплектациа нагӡоу, акласс С иаҵанакуа ареанимобиль Volkswagen Crafter.