Ауаԥс жәлари аԥсуа жәлари рҭахра ҳасаб азуны, Еиду Амилаҭқәа Реиҿкаара Аԥҟаԥҵәа аԥҟарақәеи, аҳәынҭқаррақәа рыбжьара аимабзиаратә еизыҟазаашьақәа рыбжьаҵара  иазку жәларбжьаратәи азин апринципқәа рзы 1970 шықәса рзы ирыдыркылаз Адекларациеи, 1975 шықәсызы ирыдыркылаз Европатәи атәылақәа Реидгыла ашәарҭадара Ахеилак Хельсинктәи Ахыркәшаратә акти, егьырҭ хадара злу жәларбжьаратәи аусшәҟәқәеи инарықәыршәаны – сара Урыстәылатәи Афедерациа ала Аԥсны Аҳәынҭқарреи Аахыҵ Уаԥстәылатәи Ареспубликеи рхьыԥшымра азхаҵара азы Аусԥҟақәа снапы рыҵызҩит».

Дмитри Медведев иҟаиҵаз аҳәамҭа Урыстәылатәи Афедералтә каналқәа рыла ианыддырба ашьҭахь, жәанызықьҩыла ауаа Аҟәа ақалақь агәаҿы иҟоу Аиааира Ашҭахь ицәырҵит, урҭ ари ахҭыс шьахә азы еибаныҳәон, ишәаҳәон, акәашон. Еизаз рҿаԥхьа дықәгылеит Аҳәынҭқарра Ахада Сергеи Багаԥшь.

Цәыббрамза 9, 2008 шықәса рзы  Москва ақалақь аҿы Аԥсни Урыстәылеи адипломатиатә еизыҟазаашьақәа рыбжьаҵара рылаҳәахеит, цәыббрамза 14 рзы аофициалтә визитла Аҟәаҟа дааит Урыстәылатәи Афедерациа адәныҟатәи аусқәа рминистр Сергеи Лавров.  Аофициалтә визит аҳәаақәа  ирҭагӡаны, Аԥсны Урыстәылатәи Афедерациа Ацҳаражәҳәарҭа аԥҵареи, Урыстәыла Аԥсны Аҳәынҭқарра Ацҳаражәҳәарҭа аартреи азҵаара аӡбара алыршахеит.

Цәыббрамза 17, 2008 шықәса рзы Москва ақалақь аҿы «Урыстәылатәи Афедерациеи Аԥсны Аҳәынҭқарреи рыбжьара аиҩызареи аусеицуреи аҩганктәи аицхыраареи рзы»  заанаҵтәи Аиқәшаҳаҭра анапаҵыҩра мҩаԥган.

Урыстәылатәи Афедерациа ашьҭахь Аԥсны Аҳәынҭқарра аҳәынҭқарратә суверенитети ахьыԥшымреи азхарҵеит егьырҭ атәылақәагьы.

Цәыббрамза 5, 2008 шықәсазы Аԥсны ахьыԥшымра азхазҵаз аҩбатәи тәыланы иҟалеит Ареспублика Никарагуа.

Шықәсык ашьҭахь, цәыббрамза 10, 2009 шықәсазы Аԥсны ахьыԥшымра аофициалла иазханаҵеит Боливарианттәи Ареспублика Венесуела, ԥхынҷкәынмза 15, 2009 шықәсазы– Ареспублика Науру,  лаҵарамза 23, 2011 шықәсазы – Ареспублика Вануату, цәыббрамза 18, 2011 шықәсазы  – Ареспублика Тувалу.

Лаҵарамза 29, 2018 шықәсазы Аԥсны ахьыԥшымра азханаҵеит Шьамтәылатәи Арабтәи Ареспублика.