Адырра амш лымкаала аҵак амоуп раԥхьаӡа акәны ашкол ахь зшьапы еихызго ахәыҷқәа рзы. Урҭ имҩаԥыргоит иахьа раԥхьатәи аурок. Исҭахәуп аманшәалареи, ақәҿиара дуқәеи ацзарҵ иахьа изныло амҩа ду.

Срыдныҳәалоит аҿар рааӡара знапы иану, ҳаҭыр ду зқәу ҳарҵаҩцәа. Даҽа аамҭанык иеиԥшымкәан шәара ишәыдуп аҭақԥхықәра ду. Ахәыҷқәа аҵарадырра рыҭара инаваргыланы лымкаала ахылаԥшра рышәҭароуп. Макьана  имцац адунеи зымҽхазкыз ачымазара ковид иацу ашәарҭара, иҳамазароуп агәҽанызаара, хрықәныҟәалароуп аҳақьымцәа рабжьгарақәа.

Адырра амш иара убас ирыдысныҳәалоит иреиҳаӡоу аҵараиурҭақәа рыстудентцәа, абжьара-заанаҭтә ҵараиурҭақәа рҿы здырра аззырҳауа. Иҳазгәакьоу  аҿар, шәара шәоуп знапы иану ҳаԥсадгьыл уаҵәтәи аԥеиԥш. Уи анырра арымҭар залшом аҵарахьы иаашәырԥшуа агәцаракра, ишәырҳауа адырра. Ишәзеиӷьысшьоит агәабзиара, ақәҿиара дуқәа, анасыԥ лаша.

Ҳаҭырла,

Аслан Бжьаниа,

Аԥсны Аҳәынҭқарра Ахада."