1991 шықәса цәыббрамза 27 рзы Владислав Арӡынба  хантәаҩра ззиуаз Аԥснытәи АССР Иреиҳаӡоу Асовет Аԥсны аҳазалхратә усбарҭақәа  раԥҵаразы ақәҵара аднакылеит. Абри аамҭа иалагӡаны Аԥсны Аҳәынҭқарра  Аҳазалхратә маҵзура алагала ду ҟанаҵеит аекономикатә шәарҭадара арӷәӷәараҟны, атәыла амилаҭтә интересқәа рыхьчараҟны, аҳәынҭқарра абиуџьеттә хашәалақәа рхарҭәааразы. Ҳара ҳҳазалхыҩцәа еснагь ишақәнагоу еиԥш, хаҵарыла Аԥсадгьыл аинтересқәа рыхьчон. Урҭ рахьтә аӡәырҩы Аԥсны ахақәиҭтәра рхы ақәырҵеит.

Аибашьра ашьҭахь иуадаҩыз аамҭақәа раан аҳазалхра аусзуҩцәа еснагь ашәарҭара иҭагылан хыԥхьаӡара рацәала Қыртәылантәи иҭалоз адиверсиатә-террористтә гәыԥқәа ианырҿагылаз. Убас, Аԥсны аҳәынҭқарратә ҳазалхратә еилакы аусзуцәа 20-ҩык инареиҳаны рзанааҭтә маҵзура анагӡараан иҭахеит.

Ашәарҭадара анаҩсгьы, аԥсуа ҳазалхра аусзуҩцәа жәларбжьаратәи ембаргои адунеи аҟәыҭхареи ҳанҭагылаз уи аиааирагьы рылдыршахьан. Аҭагылазаашьа уадаҩқәа раангьы Аԥсны аҳәынҭқарратә ҳазалхратә Еилакы аҿиара еиԥымҟьаӡакәа, жәларбжьаратәи астандартқәеи ҳазҭагылоу аамҭеи инарықәыршәаны аихьӡарақәа раарԥшра алнаршеит. Ҷыдала, иуҳәозар, аҳазалхратә еиқәыршәареи анапхгараҭареи рыҟны иахьатәи атехнологиақәа рхархәара, жәларбжьаратәи аекономикатә усеицзура аԥҵаразы аҭагылазаашьа бзиақәа раԥҵара.

Аԥснытәи аҳазалхратә Еилакы аусзуцәа, аветеранцәа, ишәзеиӷьасшьоит агәабзиара, агәамч, аихьӡарақәа, Аԥсны Аҳәынҭқарра амилаҭтә интересқәа рымаҵ аураҿы ақәҿиара ҿыцқәа», – ҳәа иҳәеит Аҳәынҭқарра Ахада Аслан Бжьаниа.

Аҳәынҭқарратә ҳамҭақәа ранашьара ацеремониа ахыркәшамҭаз Аҳәынҭқарратә ҳазылхратә Еилакы ахантәаҩы Оҭар Хьециа  Аҳәынҭқарра Ахада иҟаиҵаз адкылареи иааирԥшыз агәцаракреи ахшыҩзышьҭреи рзы иҭабуп ҳәа еиҳәеит.

«Иҭабуп ҳәа шәасҳәарц сҭахуп Шәара иҟашәҵо аҳазылхратә маҵзура азы. Аҳазылхратә Еилакы аусзуҩцәа рмаҵуратә уалԥшьа ламысла ишақәнагоу ала анагӡара иазхиоуп», - ҳәа иҳәеит Оҭар Хьециа.  Уи Аҳәынҭқарра Ахада ҳамҭас ииҭеит  Аԥсны Аҳәынҭқарра аҳазылхратә Еилакы 30-шықәа ахыҵра иазкны иҭыжьыз аиубилеитә журнал.