Аԥсныпресс акорреспондент аҵарадырреи абызшәатә политикеи Рминистрра аҿы иоуз адыррақәа рыла, акоронавирустә ҿкы чымазара злаҽыз рхыԥхьаӡара еизҳауа иалагар, ашколқәа рҿы жьҭаарамза 25 инаркны жьҭаарамза 31-нӡа иазԥхьагәаҭоу ҭагалантәи аԥсшьарамшқәа ирыцҵахар алшоит.
Аԥсны ауааԥсыра акоронавирустә ҿкы чымазара COVID-19 рацәыхьчара азы иаԥҵоу Акоординациатә штаб аусуратә еилатәара аихшьаалақәа рыла, ахәаша, жьҭаарамза 15 рзы атәыла аԥыза-министр Алеқсандр Анқәаб агәабзиарахьчара Аминистрреи аҵарадырреи абызшәатә политикеи Рминистрреи ачымазара алаҽра ҳасаб азуны ашколқәа рҿы аҵаратә процесс амҩаԥгара арежим азҵаара ҩаԥхьа иалацәажәарц азы анапынҵақәа ҟаиҵеит.