2021 шықәса, нанҳәамза ажәабатәи амшқәа рзы Қерим Саидов Аԥсныҟа дааны Афон Ҿыц асасааирҭа ҩны аҿы дыҩналеит. Уаҟа иара хәымш дынхеит, анаҩс Аҟәаҟа дыиасит, араҟагьы асасааирҭа ҩны дыҩналеит. Уаанӡа иоухьаз агеолокациа акоординатқәа ихы иархәаны, нанҳәамза 26, 2021 шықәса, 11:00 сааҭ инарзынаԥшуа Аидгылареи Март  4 амҩадуқәа реихысырҭаҿы Қерим Саидов «маӡала иҭаҵәаху» анаркотикатә маҭәашьар «метадон» аҭыԥ иԥшааит. Иара акапан 15,964 грамм еиҵамызт, уи ҷыдала зшәагаа дуу анаркотикатә маҭәашьарқәа изакәанымкәа раахәареи рыҵәахреи ҳәа ацәгьоура аҟазшьа аныԥшуеит ҳәа иԥхьаӡоуп.

Нанҳәамза 27 рзы атәыла аҩныҵҟатәи аусқәа Рминистрра анаркотикатә маҭәашьарқәа реикәыршара ахылаԥшра азы Аусбарҭа аусзуҩцәа Қерим Саидов дааныркылеит.  Иаанкылаз хаҭалатәи игәаҭара аан имхын  анаркотикатә маҭәашьар зҭаз аизолиациа зызуз 12 еилаҳәара.

Қерим Саидов иара убас амилициа аусзуҩцәа уаанӡа иҟаиҵахьаз «маӡалатәи аҭаҵәахқәа» рҭыԥ дирбеит. Уаантәи даҽа ҩ-еилаҳәарак аарԥшын.  Иаанкылоу аамҭала инхарҭа аҿы ирыԥшааит аметадон зҭаз даҽа 26 еилаҳәара.

Қерим Саидов имхыз анаркотикатә маҭәашьар «метадон» акапан иааизакны 15.964 грамм рҟынӡа инаӡеит.

Саидов Қерим Абуталим-иԥа Аԥсны Ашьаустә Закәанеидкыла ахәҭаҷ 224, ахәҭа 3, апункт «в» инақәыршәаны, гәыԥҩык ауаа заанаҵтәи рцәыҵеицәжәарала инагӡоу ацәгьоура –  ҷыдала зшәагаа дуу анаркотикатә маҭәашьарқәа изакәанымкәа раахәара, рыҵәахра, рыҭира хықәкыс иҟаҵаны реиҭарсра анагӡаразы ахарадҵа идҵоуп.