Аҟәа. Жьҭаарамза 28, 2021 шықәса. Аԥсныпресс. Аминистрцәа Реилазаара аҿы «Аԥсны Аҵәахырҭатә банк аҿы аԥарашьҭаҵаҩцәа 2022 шықәсазы акомпенсциақәа рызшәара азы» Ақәҵара рыдыркылеит. Аԥсны Аҳәынҭқарра атәылауаа нанҳәамза 14, 1992 шықәсанӡа Аҵәахырҭатә банк ахь иаларҵаз аԥарақәа рыла акомпенсациақәа ршәара азы аҭакԥхықәра ахахьы иагеит. Иарбоу ахықәкқәа рынагӡаразы 2022 шықәсазы иазоужьхоит 4 млн. мааҭ.
Атәыла аԥыза-министр ихаҭыԥуаҩ, афинансқәа рминистр Владимир Делба иҟаиҵаз адыррақәа рыла, аибашьрашьҭахьтәи аамҭа азы х-периодк ирыҵанакуа ашәҟәҭагалара еиҿкаан. Ашәҟәҭагалара иахысыз атәылауаа ркатегориақәа акомпенсациатә шәатәқәа раиура азы азин роуит. Ашәатәқәа рымҩаԥгара хацыркын 2011 шықәса рзы, иарбоу аамҭа инаркны иахьа-уажәраанӡа зынӡа иарбоу ашәатәқәа рзы аҳәынҭқарратә биуџьеҭ аҟынтәи иазоужьхеит 178 млн.мааҭ. Асовет аамҭазы иҟарҵаз аԥарашьҭаҵақәа роуит 13 813 – ҩык.
2021 шықәсазы имҩаԥгаз акомпенсациақәа рыҭара аицҵалыҵ 2,5 млн. мааҭ рҟынӡа инаӡоит.
«2022 шықәсазы, акомиссиа аҿы иҟоу асиақәа рыла, 4 млн. мааҭ рҟынӡа инаӡо ашәагаа ашьақәыргыларазы аԥшьгара ҟаҵоуп. Ҳара еилаҳкаауеит ас еиԥш ашәагаа ҳамч шақәхо. Убри аан, Аԥсны ас еиԥш аҭакԥхықәра ахахьы иагазар, усҟан жәаҳәарада атәылауаа акомпенсациатә шәатәқәа роулароуп», – ҳәа иҳәеит Владимир Делба.
Ари азҵаара иаҵоу аҵакы ахадара азгәеиҭеит иара убас аԥыза-министргьы. Алеқсандр Анқәаб иҳәеит: «Ари атема хадоуп. Ари аҳәынҭқарра ииашоу ашьаҿа ауп, даҽакалагьы изыҟалаӡом. Иҳалшо зегьы ҟаҳҵоит. Ари акомпенсациа иҟаҵаз алагалақәа 100% рҟынӡа ахарҭәаара залнамыршозаргьы, уеизгьы уи акырӡа аанагоит», - ҳәа иҳәеит аԥыза-министр Алеқсандр Анқәаб.
