Иара убас адепутатцәа Аҧсны Аҳәынҭқарра Аконтролтә Палата 2022 шықәсазы аныҟәгаразы аҧаратә хархәагақәа реицҵалыҵ шьақәдыргылеит. Уи 34 млн. 744 нызықь мааҭ рҟынӡа инаӡоит.

«Аконтролтә Палата ахарџьынҵа азы Ақәҵара ҩынтәны еиҭакрада абжьыҭирахь инагахоит. Акомитет аилатәара аҿы ахарџьынҵа ианалацәажәоз, уи азы акык-ҩбак рыда азгәаҭарақәа ыҟаӡамызт. Иара урҭгьы ахыбра ҿыц азы ақьыраҧса аизҳара зыхҟьеи ҳәа азҵаара акәын изызкыз. Дыҟан аминистргьы. Ҳара аекспертиза азы 9 млн. мааҭ (уи хышықәсатәи ақьыраҧса иаҟароуп) ашәареи ахыбра ҿыц аргылареи амыцхәрас 3 млн. мааҭ инарзынаҧшуа шықәсык азы ақьыраҧса ашәара еиҳа ихшыҩркхоит ҳәа иҳаҧхьаӡеит. Ҳҳәынҭқарраҿы ус еиҧш алшарақәа ыҟаӡам. Урҭ иҿыцу ахыбрахь аиасреи иманшәалоу аҭагылазаашьақәа рҿы аусуреи рҭахуп», - ҳәа илҳәеит адепутат Натали Смыр.

Адепутатцәа Ауаҩы изинқәа рыхьчаразы Аппарат абиуџьеттә харџьынҵа 2022 шықәсазы 500 нызықь мааҭ рыла аизырҳара иақәшаҳаҭымхаӡеит. Иара 2021 шықәсазы ишыҟац иаанхоит. Уи усҟан – 4 млн. 870 нызықь мааҭи рҟынӡа инаӡон.

Аҵыхәтәантәи аҧхьараҿы аамҭалатәи аусура алымшаразы аекспертизеи амедика-санитартә експертизеи рымҩаҧгара аиҿкаара  иазку Аҧсны Аҳәынҭқарра азакәанҧҵаратә зиншәҟәқәак аиҭакрақәа ралагаларазы аӡбамҭа рыдыркылеит».    

Апарламент адепутатцәа аветеранцәа, амилаҭ-хақәиҭратә қәҧареи Аҧсны жәларбжьаратәи аизолиациа аҿагылареи рзы азакәанқәа рыпроектқәа реиқәыршәара азы аусуратә гәыҧ аилазаара шьақәдырӷәӷәеит.

Амшхәаҧштә зҵаарақәа рсиа иалхын апансионат «Аҧсны» амазаратә комплекс апривтизациа иаҵанакуа аобиектқәа рсиа алагалареи, уи априватизациа амҩаҧгаразы иахәҭоу аҭагылазаашьақәа рышьақәырӷәӷәареи рзы азҵаара.