Аиҧылара аҿы ирылацәажәеит аҩтәылак ртәылауаҩратә еиҿкаарақәа рыбжьара аимабзиаратә еизыҟазаашьақәа рырӷәӷәара, атуризм аусхкы аҿы аусеицура аҳәаақәа рырҭбаара, ахәыҷтәы ҧсшьарамҭа аиҿкаара, уҳәа иадҳәалоу азҵаарақәа жәпакы ирылацәажәеит.

Владислав Гриб урыстәылатәи атуристцәа Аҧсны акурортқәа рахь ирымоу аинтересс ессааира ишызҳауа азгәеиҭеит.

Урыстәылазегьтәи атуристцәа Реидгылара Ахантәаҩы Дмитри Давыденко атуристтә сезон иааизакны иҭышәынтәаланы имҩаҧысит ҳәа иазгәеиҭеит. 

Аҳәынҭқарратә Дума адепутат Артиом Прокофиев ахәҭакахьала  атәылауаа рыҧсшьара аиҿкаара Урыстәылатәи Афедерациа Анапхгара азы хадара злоу хырхарҭаны иҟоуп ҳәа иазгәеиҭеит. Уи иарҵабыргуеит – Аҳәынҭқарратә Дума иҿыцу ааҧхьара аҿы атуризм азы акомитет аҧҵара.

Аҧсны атуризм аминистр Ҭеимураз Хышба атуризм аусхкы аҿы аусеицуразы аҩтәылак апотенциал бзиа амоуп ҳәа иазгәеиҭеит.

Аҧсны атуризм аминистр Ҭеимураз Хышбеи ауаажәларратә еиҿкаара «Урыстәылазегьтәи атуристцәа Реидгылара» ахантәаҩы Дмитри Давыденкои атуристтә индустриа аусхкы аҿы аҩганктәи Ассоциациа аҧҵара азы Аиқәшаҳаҭра рнапы аҵарҩит. 

Абри азы адырра ҟанаҵоит Аҧсны атуризм Аминистрра апресс-маҵзура.