Алеқсандр Власов аҭак ҟаҵо ҟәбантәи аказакцәа аҧхьаҟагьы арҭ аизыҟазаашьақәа рыцҵара ишазхиоу, Аҧсны жәлар Ҟәбантәи аказакцәа рыр аҟнытә есқьынгьы ацхырара ишақәгәыӷлаша иҳәеит.

Уи иара убас иҳәеит Аҧсны ишыҟоу аказакцәа рыҟәша, уи аҿиарагьы шазҧхьагәаҭоу. «Раҧхьа иргыланы, ҳара ари аҟәша иара аҭыҧаҟны аҳәынҭқарратәи амуниципалтәи мчхара адгылара  рынаҭалар ҳҭахуп. Ҳара излаҳдыруа ала, аказакцәа сынтәа аҧсабаратә рыцҳарақәа раан аҧхасҭа аҧыхраҟны ацхыраара ҟарҵеит. Ҳара  Краснодартәи атәылаҿацә аҟны аҧснытәи аказакцәа рхәыҷқәа рыдкылара ҳазхиоуп. Ҳара аепидемиологиатә ҭагылазаашьа  ҳасаб азуны  ҽаантәи ҳапрограмма наҳагӡоит. Ҳара аусеицура, аиҩызара, аицхыраара роуп гәҭакыс иҳамоу», - ҳәа иҳәеит Алеқсандр Власов.

Аҳәынҭқарра Ахада ахәыҷқәа алеишәа, апатриотизм рылааӡра иамоу аҵакы ҷыдала иазгәеиҭеит. «Ҳара гәахәарыла арҭ апрограммақәа ҳхәыҷқәагьы алаҳгалалоит», - ҳәа иҳәеит Аслан Бжьаниа.

Аиҧылараҿы ирылацәажәеит иара убас егьырҭ азҵаарақәа жәпакы.

Аиҧылара ахыркәшамҭаз аганқәа агәаларшәагатә ҳамҭақәа еимырдеит.