Аҧсны Аҳәынҭқарра апрокурор Хада Аҧсны акультура Аминистрра ахьӡала иалкаам гәыҧҩык  ауаа ринтересқәа рыхьчара азы аӡбарҭахь дадҵаалеит. Уи ишазгәеиҭаз ала, ари адҵаалара амазаратә комплекс «Баслаҭ-Аӡфымцатә станциа» Аҧсны Аҳәынҭқарра аҭоурых-культуратә ҭынхақәас иҧхьаӡоу аобиектқәа  иахьрыҵанакуа ауп ҵаҵӷәыс иаиуыз.

Ари аус ала административтә ҭакҟаҵаҩыс иқәгылоуп Аҧсны Жәлар Реизара-Апарламенти Аҧсны аминистрцәа Реилазареи, иазеинтресу ахаҿқәас иҟоуп аекономика Аминистрра, аҳәынҭқарратә мазара анапхгараҭареи априватизациеи рзы Аҳәынҭқарратә Еилакы,  Ареспубликатә Унитартә Наплакы «Амшынеқәафымцамч», иара убас Зҭакҧхықәра Ҳәаақәҵоу Аилазаара «КаРо» ирыбжьаҵаз  аиқәшаҳаҭреи Амазаратә комплекс «Баслаҭа-Аӡфымцатә станциа» аахәара-аҭира акти инақәыршәаны, Нанҳәамза 25, 2020 шықәса инаркны  иарбоу аӡфымцастанциа ампыҵакҩыс иҟоуп Зҭакҧхықәра Ҳәақәҵоу Аилазаара «КаРо».   

Аҧсны Аҳәынҭқарра азакәанқәа Реизга ахәҭаҷ 233 инақәыршәаны, административтә усеилыргара, аҳәынҭқарратә мчра аусбарҭа аӡбамҭа азашшра азы административтә усқәа рыхәаҧшра  Иреиҳаӡоу Аӡбарҭа аҿы 2-мыз ирылагӡаны мҩаҧысуеит.

Аҧсныпресс акорреспондент Апрокуратура Хада аҿы иоуз адыррақәа рыла, амазаратә комплекс «Баслаҭ-Аӡфымцатә станциа» ампыҵакҩыс иҟоуп Зҭакҧхықәра Ҳәаақәҵоу Аилазаара «КаРо». Уи адиректор Хадас дыҟоуп Кама Валери-иҧҳа. Аҧҵаҩыс дыҟоуп Кәарҷиа Кан Валери-иҧа. 

Аиуристтә хаҿқәа иаку аҳәынҭқарратә реестр иалагалоу адыррақәа рыла, цәыббрамза 16, 2011 шықәсазы  Зҭакҧхықәра Ҳәаақәҵоу Аилазара «КаРо» адиректор Хадас дыҟан Кәарҷиа Нестр Кан-иҧа, аҧҵаҩыс – Кәарҷиа Кан Валери-иҧа.