Атурнир рхы аладырхәеит Аԥснынтәи еиԥш Урыстәыла еиуеиԥшым ақалақьқәа рҟынтәии 80–ҩык аспортсменцәа, хҩык агросмеистерцәагьы уахь иналаҵаны. Урыстәылантәи иааит 30 -ҩык ашахматистцәа.
Атурнир адиректор – Аԥсны ашахматқәа Рфедерациа Апрезидент Константин Ҭыжәба, аӡбаҩ хада – Аԥсны Аҳәынҭқарра I акатегориа аӡбаҩ Оҭар Хәырхәмал.
Атурнир аԥхьахәтә фонд – 500 нызықь мааҭ рҟынӡа инаӡоит.
Атурнир ФИДЕ аԥҟарақәа рыла имҩаԥысуеит - швеицариатәи асистема ала 12 тур, акомпиутертә аҵәҭаԥсара. Аамҭа агәаҭара: актәи аныҟәара инаркны аныҟәарацыԥхьаӡа 15 минуҭ + 5 секундк. Атурнир аҿы аиааира згази аԥхьахәқәа згази ахраҿақәа, амедалқәа, аҳаҭыртә шәҟәқәа, ранашьахоит.
Ашахматтә турнир «Аԥсны. Тамшь-Village 2022» аиҿкаара ахахьы иагеит Аҿари аспорти рзы Аҳәынҭқарратә Еилаки Аԥсны ашахматқәа Рфедерациеи Аԥсны аҵарадырреи абызшәатә политикеи Рминистрра. Афинанстә цхыраара ҟарҵеит «Универсал Банк», аилазаара ««А-Мобаил», Гәылрыԥшь араион Ахадара.