Аҟәа. Жәабранмза 11, 2022 шықәса. Аԥсныпресс. Урыстәылатәи ахархәарахылаԥшра Аусбарҭа Аԥсны агәабзиарахьчара Аминистрра 50 нызықь инарзынаԥшуа акоронавирустә ҿкы чымазара аарԥшра азы аҭҵаарақәа рымҩаԥгара азы ПЦР-тестқәа азоунажьит.  Абри азы агәабзиарахьчара Аминистрра ахаҭарнакцәа рыпресс-конференциа аҿы адырра ҟалҵеит Аепидемиологиеи атерапиеи рзы Анаукаҭҵааратә Институт   (НИИЭПиТ) аиммунологиеи авирусологиеи рлабораториа аиҳабы, агәабзиарахьчара аминистр ихаҭыԥуаҩ Алиса Матуа.

Уи ишазгәалҭаз ала, иҳаҩсыз ҩымчыбжь рыла ПЦР-тест аҭаразы иадҵаалаз рхыԥхьаӡара акыр иазҳаит, аха Аԥснытәи алабораториақәа ари аусура анагӡара рылшеит.  

«Аусзуҩцәа реиҳараҩык чмазаҩын, аха алабораториа аусура мышкгьы иаанымкылаӡеит», - ҳәа иазгәалҭеит Алиса Матуа.