Аҩныҵҟатәи аусқәа рминистр актәи ихаҭыԥуаҩ Руслан Ажьиба ихантәаҩрала ишьақәгылоу акомиссиа ҷыда аилазаараҿы иҟоуп аҩныҵҟатәи аусқәа Рминистрра аҟәшеиҵақәа рнапхгаҩцәа  – аексперт-криминалисттә центр, анаркотикқәа реикәыршара ахылаԥшра азы аусбарҭа, Аԥсны аҩныҵҟатәи аусқәа Рминистрра ахатәы шәарҭадара аусбарҭеи ашьаусԥшаара аусбарҭеи, апрокуратура Хада, Аҳәынҭқарратә шәарҭадара Амаҵзура, агәабзиарахьчара Аминистрра, аекологиеи аԥсабара ахьчареи рзы аҳәынҭқарратә Еилакы, аӡбаратә нагӡаҩцәа Рмаҵзура, Аԥсны Аҳәынҭқарра Ауаажәларратә Палата ахаҭарнакцәа.

Акомиссиа алахәылацәа иқәгахо амаҭәашьарқәеи, иара убас урҭ зҭаз атареи рхыԥхьаӡареи ршәагааи рыкапани, уҳәа рзы адыррақәа рыҭан. Ақәхразы инагаз аекземплиарқәа зегьы амҳәыр раархан, анапаҵыҩрала ишьақәырӷәӷәан.

Иқәгахеит кьылаки бжаки инареиҳаны иџьбароу анаркотикатә маҭәашьарқәа (метадон, героин, мефедрон), 14 кьыла инареиҳаны каннабис (марихуана) ҳәа изышьҭоу,  апсихотроптә хархәага, иара убас абларкыгатә чаз, абларкыга (мак) аҵиаақәеи, шәкы инарзынаԥшуа  аныцә (коноплиа) ашьапқәа..

Аԥсны аҩныҵҟатәи аусқәа Рминистрра  аексперт-криминалисттә Центр аҿы иҭҵааз, иара убас  аӡбарҭақәа рыӡбамҭақәа рыла ақәгара зыхәҭаз анаркотикатә хархәагақәа, апсихотроптә маҭәашьарқәеи узырҩышьуа аҵиаақәеи рзы урҭ рыхьӡқәа зныз акт еиқәыршәан.