Аҟәа. Жәабранмза 26, 2022 шықәса. Аԥсныпресс. Аԥсны аԥыза-министр ихаҭыԥуаҩ, економика аминистр Кристина Озган Аԥсны Аҳәынҭқарра асоциал-економикатә ҿиара ацхыраара аҭаразы Аинвестициатә программа аҳәаақәа ирҭагӡны зеиҭашьақәыргылареи зыргылареи мҩаԥысуа аобиектқәа дырҭааны игәалҭеит, ҳәа иаанацҳауеит Аԥсны аекономика Аминистрра аофициалтә саит. Аусуратә ҭаара аҿы уи длыцын шьаҭанкылатәи аргылара азы Аусбарҭа аиҳабы Ҭемыр Агрба.
Аминистр Очамчыра араион Мықә ақыҭан иҟоу аӡеихшарҭатә шьақәгылага даҭааит, ареспубликатә трасса «Ԥсоу-Егры» Аҟәеи Очамчыреи еимаздо ахәҭа арлашара иазку аусурақәа рымҩаԥысшьа гәалҭеит. Кристина Озган иара убас икьакьоу абзазартә црыҵқәа рзы аполигон аргылара ахьымҩаԥысуа Гәылрыԥшь ақыҭа Кациқыҭ даҭааит. Кристина Озган шьаҭанкылатәи аргылара азы Аусбарҭа ахь аусурақәа рымҩаԥгара аҽҳәарақәеи ахаҭабзиареи ахылаԥшра арӷәӷәаразы адҵа ҟалҵеит. Актуалра злоу ариашарақәеи арҽеирақәеи злоу аинформациа ахарџьынҵатә документациа иарбоу аусурақәа зегьы 2022 шықәса нҵәаанӡа рхыркәшара азы иааиԥмырҟьӡакәа атәыла аекономика Аминистрра ахь инеиуазароуп.
Уаанӡа Аҳәынҭқарра Ахада Аслан Бжьаниа Аԥсны Аҳәынҭқарра асоциал-економикатә ҿиара ацхырааразы Аинвестициатә Программа ала аусмҩаԥгатәқәа рынагӡара азы аусурақәа рырццакра азы адҵа ҟаиҵахьан. Аҳәынҭқарра Ахада аԥыза-министр ихаҭыԥуаҩ, аеконоика аминистр Кристина Озган 2022 шықәсазы Аинвестициатә программа анагӡара аҽҳәарақәа рырццакразы иҟоу алшарақәеи амеханизмқәеи рхархәаразы анапынҵа лиҭеит.