Аҟәа. Мшаԥымза 27, 2022 шықәса. Аԥсныпресс. Мшаԥымза 26 рзы Алхратә Комиссиа Хада аҿы Адлеиба Џьансыхә Иван-иԥа алхырҭатә ҭыԥхада №8 (Алашарбагатә) ала Жәлар Реизара-Апарламент адепутатрахь акандидатс иқәыргыларазы аԥшьгаратә гәыԥ ашәҟәы иҭагалоуп.
Уаанӡа ашәҟәы иҭагалан алхырҭатә ҭыԥхада №8 (Алашарбагатә) ала Гәыбаз Леон Реваз-иԥа, Чачхалиа Иракли Заур-иԥа, Кәакәасқьыр Ҭемыр Омар-иԥа, Нарманиа Наур Геннади-иԥа Жәлар Реизара-Апарламент адепутатрахь акандидатс рықәыргыларазы аԥшьгаратә гәыԥқәа.
Алхратә ҭыԥхада №8 (Алашарбагатә) ала аиҭалхрақәа мҩаԥгахоит лаҵарамза 28 рзы.
Алхратә ҭыԥхада №8 ала хәажәкырамза 12 рзы иқәгылан 7 – ҩык адепутатрахь акандидатцәа. Абжьыҭира аҩбатәи атур ахь инеит ҩыџьа акандидатцәа - Леон Гәыбази Наур Нарманиеи. Хәажәкырамза 26 рзы аҩынтәраан абжьыҭираҿы иарбоу аокруг ала иқәгылаз ҩыџьа акандидатцәа еиҟараны абжьқәа роуит–989, убри аҟнытә алхақәа зымҩаԥымсӡеит ҳәа иԥхьаӡахеит.