Иалацәажәеит Аҟәа ақалақь аҿы амҩақәа реиҭашьақәыргылара иадҳәаланы имҩаԥысуа аусурақәа рцашьа, иара убас асоциалтә ҵакы змоу аобиектқәа – Афонҿыцтәии Очамчыратәи ахәыҷбаҳчақәа рҿы аргыларатә гхақәеи амалырқәеи рырҽеира.
Излацәажәаз азҵаарақәа рхыԥхьаӡараҿы иҟоуп иара убас ҳазҭоу аамҭазы Очамчыратәи алицеи-интернат, Лыхнытәи, Дәраԥшьтәи абжьаратәи ашколқәа, иара убас Лыхны ақыҭан иҟоу аибашьцәа рмемориал аҭагылазаашьа иадҳәалоу азҵаарақәагьы.
Атәыла аԥыза-министр Шьаҭанкылатәи аргылара азы Аусбарҭеи Ареспубликатә унитартә Наплакы «Аԥсныргылара» анапхгаҩцәа иарбоу аобиектқәа рҿы ихымԥадатәиу аусрақәа рымҽхак аилкаареи апроект-харџьынҵатә документациеи реиқәыршәара азы адҵа риҭеит.
Аилатәара иалахәыз иҳаҩсыз ашықәс азы ҳреспублика аҿы иҟаз амшцәгьақәа ирыхҟьаны ааха зауз ауааԥсыра ироуз азарал ахарҭәаара азҵаара иалацәажәеит.