Аҵара ахысрааан акурсантцәа атеориатәии аҧышәатәи адыррақәа дырҳараны иҟоуп.
Урыстәылатәи Афедерациа Иҷыдоу аҭагылазаашьақәа рзы Аминистрра иатәу аҳәынҭқарратә абылрацәыхьчаратә Академиа аусура ихадоу ахырхарҭаны иҟоуп абылрацәыхьчара, атехносфератә шәарҭадара, ауааҧсыреи атерриториақәеи иҷыдоу аҭагылазаашьақәа рацәыхьчареи, аинформациатә технологиақәеи, уҳәа рганахьала аспециалистцәа разыҟаҵара.
Аҧсны Иҷыдоу аҭагылазаашьақәа рзы Аминистрра жәабранмза, 2010 шықәсазы Москва ақалақь аҿы знапаҵыҩра мҩаҧысыз аҩганктәи анапхгарабжьаратәи аиқәшаҳаҭра инақәыршәаны, Урыстәылатәи Афедерациа Иҷыдоу аҭагылазаашьақәа рзы Аминистрра иатәу аҵараиурҭақәа рахь акурсантцәа дәықәнаҵоит.
Уажәы Урыстәылатәи Афедерациа Иҷыдоу аҭагылазаашьақәа рзы Аминистрра иатәу аҳәынҭқарратә абылрацәыхьчаратә Академиа аҿы Аҧснынтәи аҵара рҵоит 25-ҩык Аҧсны атәылауаа.