Гәдоуҭа ақалақь аҿы иҟоу Сергеи Платон-иԥа Дбар ихьӡ зху Аԥсны жәлар Рџьынџьтәылатәи еибашьра амузеи аҿы иналукааша ар реиҳабы изку афотоцәыргақәҵа аатит.

Асааҭ 14:00 рзы 1992-1993 шш. Аԥсны Аџьынџьтәылатәи еибашьра аҿы иҭахаз Рмемориал амҵан ашәҭ шьыҵәрақәа рышьҭаҵара иазку ацеремониа мҩаԥысит. Иара убас, Аҟәа ақалақь Ахьӡ-Аԥша апарк аҿы игылоу Сергеи Платон-иԥа Дбар ибаҟа амҵан ашәҭ шьыҵәрақәа шьҭарҵеит.

Аҟәа ақалақь, В.Г. Арӡынба ихьӡ зху Арратә Ахьӡ-Аԥша амузеи аҿы имҩаԥысит агәалашәаратә хәылԥазы. Аинрал ҳаҭырла дыргәаладыршәарц азы арахь имҩахыҵит Аԥсны Аҳәынҭқарра Ахада Ихаҭыԥуаҩ Бадра Гәымба, Жәлар Реизара-Апарламент Аиҳабы Валери Кәарҷиа, атәыла анапхгара алахәылацәа, аибашьра аветеранцәа, ауаажәларратә усзуҩцәа.

Еизаз рзы иқәгылеит еицырдыруа амузыкантцәа, иара убас илегендатәу ансамбль «Аԥсны-67». Ахәылԥаз алагамҭазы аекран ду аҿы иддырбеит Сергеи Дбар дызну Аԥсны Аџьынџьтәылатәи еибашьра аамҭазтәи афото-видеоархив. Цәыббрамза 27, 1993 шықәса рзы Аҟәа ақалақь ахақәиҭтәразы иҟаҵаз аҭыхымҭақәа руак аҿы  Сергеи Платон-иԥа Дбар иҳәеит: «Аибашьра цонаҵы сара сеинралӡам, сара ссолдаҭуп”. Убасҵәҟьа иара иԥсҭазаара кьаҿ зегьы иалагӡаны, ауадаҩрақәа дырцәымшәаӡо дааиуан, аибашьраамҭазтәи, анаҩс аҭынчаамҭазтәи аԥсҭзаараҿы ицәырҵуаз ахьанҭарақәа хачҳарыла дыриааиуан. Азал аҿы иҟаз зегьы Сергеи Платон-иԥа Дбар минуҭктәи аҿымҭрала дыргәаладыршәеит.