Аҟәа. Нанҳәамза 13, 2021 шықәса. Аԥсныпресс. Аҟәа ақалақь аҿы Акьыртааи Челиускинрааи рымҩаду абжьара иҟоу Аплошьад Зураб Ачба ихьӡ ахҵахоит.  Уи азы аӡбамҭа рыдыркылеит иахьа имҩаԥысыз Аҟәа ақалақьтә Еизара изаамҭанытәиу аилатәара аҿы, ҳәа адырра ҟанаҵоит Аҟәа ақалақьтә Еизара апресс-маҵзура.

Аизара аилатәара  рхы аладырхәит аҳҭнықалақь ахада Беслан Ешба, ауаҩы изинқәа рыхьчаразы азинмчы змоу Асида Шьаҟрыл, Агуманитартә программақәа Рцентр адиректор Арда Инал-Иԥа, иара убас Агәыҳалалратә фонд «Амшра» ацнапхгаҩы Аида Ладариа. Урҭ ауаажәларра рыхьӡала Зураб Константин-иԥа Ачба ихьӡ анаунагӡатәра азы ажәалагала ҟарҵеит.