Поиск по слову

Календарь

« Абҵара 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  
АЖӘАБЖЬҚӘА

АЛЕҚСАНДР АНҚӘАБ: «АҴАРАДЫРРА АԤСҬАЗААРА АХЫҚӘКҚӘА ЗЕГЬЫ ИШАХӘҬОУ АЛА РЫНАГӠАРЕИ, ИАРА УБРИ АЛА АԤЕИԤШ БЗИА АИУРЕИ АЛЗЫРШО АКАКӘНЫ ИААНХОИТ»

Аҩаша, 31 Нанҳәа 2021 10:04 230

Аҟәа. Нанҳәамза 31, 2021 шықәса. Аԥсныпресс.   Адыррақәа рымш аламҭалазы, атәыла аԥыза-министр Алеқсандр Анқәаб ашколхәыҷқәеи арҵаҩцәеи аҭаацәеи аҵарашықәс ҿыц алагара рыдиныҳәалеит.

***

Ҳаҭыр зқәу аҵаҩцәа, арҵаҩцәа, аҭаацәа!

Цәыббрамза 1 азы ҳтәыла ашколқәа зегьы рҿы адыррақәа Рымш азгәарҭоит. Зықьҩыла ахәыҷқәа  урҭ иреиҳабууи ашколқәа рҿы рҵара иацырҵоит, аӡәырҩы раԥхьаӡа акәны ашкол ахь ршьапы еихыргоит, раԥхьатәи рырҵаҩцәеи дареи еибадыруеит.

Ашкол аҿы аҵара ашықәсқәа – ари зегьы расҭа ихадоу, иршанхагоу, узтәызтәуа, иухамышҭуа, еиуеиԥшым ахҭысқәеи адыррақәеи рыла игәылҭәаау аамҭахәҭоуп. Араҟа ауаатәыҩса рыҿиара аҭоурых зегьы иалагӡаны ироуз адыррақәа ауасхыр шьҭаҵахоит, аҟыбаҩ аатуеит. 

Уаанӡа еиш иахьагьы, аҵарадырра  аԥсҭазаара ахықәкқәа зегьы ишахәҭоу ала рынагӡареи, иара убри ала аԥеиԥш бзиа аиуреи алзыршо акакәны иаанхоит. Ауаҩы иааиԥмырҟьаӡакәа иҵарадырра аҩаӡара аизырҳара дашьҭазароуп, илшарақәа еихаиҳауазароуп, избан акәзар адунеигьы убасҵәҟьа иааҟәымҵӡакәа аҿиареи аҽыԥсахреи иаҿуп, уи еиҳа-еиҳа иуадаҩхоит.

Ҳара, аиҳабацәа, зегьы раасҭа аҟыбаҩ злоу, зегьы раасҭа абаҩхатәра злоу, зегьы раасҭа иҟәыӷоу - ҳара ҳхәыҷқәа шраку, урҭ хымԥада рыгәҭакқәа зегьы рынагӡара шрылшо азы есымша агәра ҳгоит.  Ус ауп аҭаацәа ргәыӷрақәа рдунеи шыҟоу, урҭ хымԥада инагӡахароуп.

Зҭоурых аамҭа иалагӡаны акыр амыҟәмабарақа зхызгахьоу ҳара ҳтәыла хәыҷы хра злоу аҿиареи  иҭышәынтәалоу аҳәынҭқарратә шьақәгылареи рзы акырӡа аҵак ду амоуп шәара шәдыррақәеи шәықәҿиарақәеи.

Иалагаз аҵарашықәс ҿыц ҳара акоронавирустә ҿкы чымазара алаҵәара инамаданы ишьақәгылаз имариам асанитар-епидемиологиатә ҭагылазаашьа аҿы ҳалагоит.   Иҳамоу аԥышәа ишаҳнарбо ала, ахәыҷқәеи урҭ рҭаацәеи ргәабзиареи рыԥсҭазаареи аиқәырхара азы ишьақәырӷәӷәоу асанитар-епидемиологиатә нормақәа зегьы рынагӡара хымԥадатәиуп. Уи адагьы уаҳа ԥсыхәа ыҟаӡам! Ҳара ҳаибахьчар, ари апроблемагьы ҳаиааиуеит.  

Шәҭаацәеи шәареи анасыԥ шәзеиӷьасшьоит, аҵарадырратә еилазаара –  аҵара-ааӡаратә процесс аҿы иаԥсоу аҵаҩцәеи аихьӡара ҿыцқәеи.

Ҳара даараӡа ҳшәықәгәыӷуеит.

Адыррақәа Рымш аламҭалазы аҵарашықәс ҿыц алагара шәыдысныҳәалоит!

Ҳаҭырла, Алеқсандр Анқәаб,

Аԥсны Аҳәынҭқарра аԥыза-министр

Нанҳәамза 31, 2021 шықәса.

 

 

Last modified on Ахәаша, 01 Жьҭаара 2021 17:14
« АҲӘЫНҬҚАРРА АХАДА ЧЕЧЕНТӘЫЛА АРЕСПУБЛИКА АҞЫНТӘ АДЕЛЕГАЦИА ИДИКЫЛЕИТ АҞӘА АҚАЛАҚЬ АҾЫ АМАШӘЫРТӘ ХҬЫС ҞАЛЕИТ »
Хыхь