Аҳәынҭқарра Ахада Урыстәыла анапхгара иҭабуп ҳәа реиҳәеит иҟарҵо ацхыраареи адгылареи рзы. Аслан Бжьаниа дырзааҭгылеит аԥсуа гани урыстәылатәи аделегациеи злацәажәараны иҟаз азҵаарақәа жәпакы. Уи иара убас ареспублика аҿы макьаназы аекономика аҿы шьаҭанкылатәи аиҭакрақәа шыҟамлац азгәеиҭеит. «Ҳара ҳреспублика аҿы иахьа аусурҭадара апроблема шыҟац иаанхоит, Урыстәылатәи Афедерациа асубиектқәа ирҿырԥшны аулафахәы аҩаӡара лаҟәуп. Ари аҭагылазаашьа хымԥада ирҽеитәуп», - ҳәа иҳәеит Аԥсны Аҳәынҭқарра Ахада Аслан Бжьаниа.  Аҳәынҭқарра Ахада Аԥсны асоциал-економикатә ҿиара Апрограмма залагалара азԥхьагәаҭоу ахырхарҭақәа дырзааҭгылеит. Урҭ иреиуоуп – амҩатә инфраструктура, афымцамч, агазификациа, аӡылеиқәыршәара, аканализациа, аҳаирбаӷәаза аиҭашьақәыргылареи ахархәарахь аҭареи, аихамҩа, мшынла аимадара, икьакьоу абзазаратә црыҵқәа аус рыдулара, ақьырсиантә культуратә баҟақәа  реиҭашьақәыргылара, ашәахтә хырхарҭа иадҳәалоу азҵаарақәа, аҳәынҭқарратә ҳәааҿы иҟоу аҭагылазаашьа уҳәа, убас егьырҭгьы.

«Еиқәыԥхьаӡоу аусурақәа рымҽхак акыр иҭбаауп, насгьы урҭ рынагӡаразы иаҭаххо аԥаратә хархәагақәа маҷӡам, аха урҭ рыцәшәара аҭахӡам, урҭ ашықәсқәа рыла   еихшахоит. Уи ауп ҳара ҳуааԥсыра рыԥсҭазаара аҩаӡара аизырҳара алзыршо. Уи еиӷьу иахьазы уаҳа даҽа механизмк ыҟаны избом. Ауаа усуратә ҭыԥла ианеиқәшәахалак, урҭ иҭышәынтәалоу ахашәалахәы роуа ианыҟалалак – усҟан уи ҳара акыр зҵазкуа аус аҟаҵара ҳалҳаршеит ҳәа ауп иаанаго», - ҳәа инаҵшьны иазгәеиҭеит Аҳәынҭқарра Ахада Аслан Бжьаниа.