Аибашьра иазку ргәалашәарақәа реиҭаҳәаразы Аԥсныпресс акорреспондент иҟаиҵаз аҳәарала Чечентәылантәи иааны Аԥсны хатәгәаԥхарала еибашьуаз Рассоциациа ахантәаҩы, Леон Иорден акавалер Вахид Қеримов иҳәеит: «Ари Аиааира Амныҳәа мацара акәӡам, ари амш иаҵанакуа рацәоуп, уи аԥсуа жәлар рхьыԥшымра Амш ауп. Аԥсны иақәлаз агрессор ииааира иасимволхеит ари амш. Аиааира агара даара ихьанҭан, избан акәзар  еибашьуаз аганқәа мчыла еиҟарамызт, ҳара уаалеи бџьарлеи рыла акыр ҳаиҵан.  Иҳамаз абџьари аџьаԥҳани аиҳарак атрофеи ҳасабла аӷа имаҳхыз акәын. Аха ҳара иҳаман ақырҭцәа ирымамыз акы – ҳара иҳаман аибашьҩы, аԥсадгьыл ахьчаҩы игәеицамкра, зегьы ҳаидгыланы аԥсуа дгьыл ахьчареи, ианаҭахха азы уи аԥсҭазаара ахҭынҵареи ҳазхиан. Уи аибашьра аҿы иҭахеит 70-ҩык ачеченцәа. Аӡәырҩы еиуеиԥшым ахәрақәа роуит, иинвалидцәахеит».

Аибашьра аветеран, Леон Иорден занашьоу Надежда Хонелиа цәыббрамза  30 лбаталион  «Шьараҭын» дацны Егры аӡиас аҿы даԥылеит.  «Ҳаӷацәа ирымаз аҵыхәтәантәи аминуҭқәа рхы иархәаны ишрылшоз ала ршьамхы рҽадыргон. Араҟа иӷьычны иргаз зегьы амашьынақәа ирҭаҵаны иргар рҭахын, аха ҳрыхҭыгәлошәа анырба, урҭ зегьы кажьны, рыхәцәагьы, рыԥсцәагьы, рабџьаргьы уахь иналаҵаны,  рыԥсы ргеит. Усҟан ҳара иаҳнырит Аиааира иацыз иҳәаадоу агәырӷьара, жәала иузҳәашам ҳаԥсадгьыл ақырҭуа мпыҵахалыҩцәа рҟынтәи ахақәиҭтәра ахьҳалшаз аҟынтәи иҳауз ацәаныррақәа ртәы», -   ҳәа илгәалалыршәеит Надежда Хонелиа.  Лара Аԥсны аҭынчреи аизҳазыӷьареи азеиӷьалшьеит.

Надежда Хонелиа лԥа Ҭемыр Хонелиа аибашьра ианалага ашьҭахь ахԥатәи амш, нанҳәмза 16 рзы ателехәаԥшратә ҳар ахьчараан дҭахеит.