Аҟәа. Жьҭаарамза 4, 2021 шықәса. Аԥсныпресс. Аԥсны Жәлар Реизара-Апарламент ахыбра аҿаԥхьа амитинг ахь еизаз ауаа рахь идәылҵит Аԥсны Аҳәынҭқарра Ахада Ихаҭыԥуаҩ Бадра Гәынбеи Ашәарҭадара ахеилак Амаӡаныҟәгаҩ Сергеи Шамбеи. Урҭ Аслан Бжьаниеи Аӡҩабжьа ақыҭауааи реиқәшәара алҵәшәақәа рзы адырра ҟарҵеит.
Бадра Гәынба иажәақәа рыла, Аҳәынҭқарра Ахада иҟалаз аинцидент азы игәаанагара иҳәеит. Уи Апрокуратура Хада ихацнаркыз аусеилыргара алҵшәақәа рышьҭахь азыӡба шидикыло иҳәеит.
Аҭакс еизаз ауаа Аҳәынҭқарра Ахада иԥыларазы ицаз Аӡҩыбжьа ақыҭа ахаҭарнакцәа Аҳәынҭқарра Ахада ишиқәшаҳаҭым, ас еиԥш азыӡба ишадымгыло, насгьы аҩныҵҟатәи аусқәа рминистри уи ихаҭыԥуаҩцәеи зыԥшра ҟамҵакәа рамхра дҵаны ишықәдыргыло, уи-моу иҟоуп урҭ рҭакрагьы иадгыло рҳәеит.
Бадра Гәынбеи Сергеи Шамбеи хаҭала дара шԥахәаԥшуеи иҟалаз ахҭыс ҳәа азҵаара рырҭеит. Урҭ ари ахҭыс зегьы реиԥш даргьы акыр ргәы шыднархьыз, ишақәыӡбо азы инаҵшьны иазгәарҭеит. Ас еиԥш азалымдара ҟамлароуп аринахысгьы, ҳәа рҳәеит дара.
Аҳәынҭқарра Ахада Ихаҭыԥуаҩ Бадра Гәынбеи ашәарҭадара Ахеилак Амаӡаныҟәгаҩ Сергеи Шамбеи еизаз ауаа рахь аусеилыргара хыркәшахаанӡа иааԥшырц азы ааԥхьара ҟарҵеит.
Амитинг ахь еизаз ауаа убасҵәҟьа аинцидент ҟалеижьҭеи мышқәак шыҵуагьы, иахьа уажәраанӡа атәыла анапхгара аҟынтәи аӡәгьы аветеранцәа рахь иахьымнеиц, ргәабзиара аҭагылазаашьа иахьазымҵаац азы ӷәӷәала агәынамӡара аадырԥшит.
