1978 шықәса абҵарамза 6 – ҳажәлар рҭоурых аҿы акрызҵазкуа рыцхәуп. Абри амш аҽны имҩаҧысит Аҧсуа телехәаҧшра раҧхьатәи аефир. Ари ахҭыс аиаша иазықәҧоз Аҧсны жәлар рмилаҭ-хақәиҭратә қәҧараҿы аҭыҧ ҷыда аанызкылаз хҭысуп. 

1992-1993 шш. Аҧсны Аџьынџьтәылатәи еибашьраан Аҧсуа Телерадиоеилахәыра аусзуҩцәа русураҟны иаадырҧшыз агәымшәареи ахачҳареи ирыбзоураны, иахьа иҳамоуп ишьаарҵәыраз урҭ ахҭысқәа рыхроника, адунеитә уаажәларра иадырит ақырҭуа националистцәа ргыгшәыгра атәы зҳәо аҵабырг.

Ателехәаҧшреи арадиои рыҟны аусура иаҭахуп арҿиаратә знеишьа, ахамеигӡара.

Ҳазҭагылоу аамҭазы аинтернет ахархәара иабзоураны                                                                                                                                    ахәаҧшцәеи азыӡырҩцәеи ирыдгалатәуп аинтерес зҵоу адырраҭарақәа. Гәахәароуп иахьа Аҧснытәи аҳәынҭқарратә Телерадиоеилахәыра аефиртә аамҭа ахьарҭбаауа, аҿыцрақәа ахьаланагало. 

Аҧсуа Телерадиоеилахәыра аколлектив аҟны апрофессионалцәа ирывагыланы аус руеит ателехәаҧшреи арадиои ҧсҭазаарас измоу аҿар. Аҧсуа Телерадиоеилахәыра ари аҧышәа аихаҳара, аҿиара, ҧхьаҟа ацара иазҳәоуп.

Абри аныҳәамш азы Аҧснытәи аҳәынҭқарратә Телерадиоеилахәыра аколлектив зегьы ирзеиӷьасшьоит арҿиаратә гәазыҳәареи аихьӡара дуқәеи!»