Аҟәа. Абҵарамза 17, 2021 шықәса. Аҧсныпресс. Акультура аминистр Гәыдиса Агрба Аҧсны зҽаҧсазтәыз артист, «Ахьӡ-Аҧша» аорден II аҩаӡара акавалер, аҧсуа актиор, адраматург, апрозаик, апублицист, аҳәынҭқарратәии ауаажәларратәи аусзуҩ Анӡон Мықәба 75-шықәса ихыҵра идиныҳәалеит.
Аҧсны акультура Аминистрра ахада ашәҟәыҩҩы аҧснытәи акультура илагала ду инаҵшьны иазгәеиҭеит.
Анӡон Кәакәа-иҧа, Шәара иналукааша ашәҟәыҩҩ, апублицист, ауаажәларратә усзуҩуп. Акыр шықәса инеиҧынкыланы Шәара Аҟәатәи аурыс ахәаҧшҩы қәыҧш итеатр асахьаркыратә напхгаҩыс аус шәуеит. Араҟа изныкымкәа иқәыргылахахьеит шәырҿиамҭақәа рыла аспектакльқәа. Шәара шәнапы иҵыҵыз аҩымҭақәа рыла Аҧсуа драматә театр аҿгьы аспектакльқәа ықәдыргылахьеит, урҭ ҟәҿиара дула имҩаҧысит, ахәаҧшцәа зеиӷьаҟам ала ирыдыркылеит. Гәык-ҧсыкала ишәыдысныҳәалоит шәиубилеи, ишәзеиӷьасшьоит агәабзиара, агәамч, ааҧсара зқәум аусуралшара!», - ҳәа иҳәеит Гәыдиса Агрба.
Анӡор Мықәба аминистр иҭабуп ҳәа еиҳәеит иоуз ахшыҩзышьра азы. Аминистр аиубилиар ианеишьеит ашәҭқәа, аҧсуа лабашьеи ахҭырҧеи.
*** Ашәҟәыҩҩы, Аҧсны зҽаҧазтәыз артист Мықәба Анӡор Кәакәа-иҧа диит абҵарамза 17, 1946 шықәсазы Гәдоуҭа араион Оҭҳара ақыҭан.
1964 шықәсазы уи Оҭҳаратәи абжьаратәи ашкол даналга ашьҭахь дҭалеит Шь. Русҭавели ихьӡ зху Қарҭтәи атеатралтә институт. Уи далгеит 1968 шықәса рзы.
1968-1975 шш. – С.Ҷанба ихьӡ зху Аҧснытәи аҳәынҭқарратә драматә театр актиор, адраматург, апрозаик, аповестқәеи ажәабжьқәеи равтор. Иара иҭоурыхтә драмақәа «Амра атәыҩ акра» (1976ш.), «Ашәқәа зегьы анаарту» (1978ш.), арежиссиор Дмитри Кортаа иқәыргылара ала аҧсуа сцена аҿы қәҿиарала имҩаҧысуан.
Уи ипиеса «Уарда» Аҟәатәи аурыс ахәаҧшҩы қәыҧш итеатр асценаҿы имҩҧысуан. Апиеса «Аламыс» (М.Лакрба иновеллақәа рмотивқәа рыла) Асовет Еидгыла Жәлар рартист Ш.Ԥачалиа иқәыргыларала убасҵәҟьа аҧсуа сцена аҿы қәҿиара дула имҩаҧысит (1971 ш).
Еиуеиҧшым ашықәсқәа раан Анӡор Мықәба Аҧснытәи адраматә театр алитературатә ҟәша анапхгаҩыс (1975-1982шш.), Аҟәатәи аурыс ахәаҧшҩы қәыҧш итеатр адиректори асахьаркыратә наҧхгаҩыси аус иуан (1983-1989 шш.).
2003-2010 шш. – ажурнал «Амцаб» аредактор.
2005-2010 шш. – арепатриациа азы аҳәынҭқарратә Еилакы ахантәаҩы.
Анӡор Мықәба – Аҧсны ашәҟәыҩҩцәа Реидгылеи ашәҟәыҩцәа реидгыларақәа Жәларбжьаратәи Аилазаареи рылахәыла.
2011-2016 шш. Аҧсны ашәҟәыҩҩцәа Реидгыла ахантәаҩыс аус иуан.
Актиорк иаҳасабала уи Аҧснытәи аҳәынҭқарратә драматә театр аҿы абарҭ арольқәа наигӡахьеит: Кочкариов («Аҧҳәысаагара» Н.Гоголь, 1968 Ш.), Дон Карлос («Дон Карлос» У.Шекспир, 1971 ш.), Андреи («Арбаӷь абжьы гаанӡа» И.Буковчан,1974ш.), Нарчоу («Амра атыҩ анакуа» М.,1976 ш. Е.Сымсым, 1981), Нестор Лакоба (Март ҧшьба» Ш.Аџьынџьал, 1987 ш.), уҳәа убас егьырҭгьы.
Анӡор Мықәба – аповестқәа «Мгәыӡ Ҳасан», «Гәашанеи», ажәабжьқәеи апиесақәа «Амра атәыҩ анакуа», «Инашаноу аҧса» дравторуп.
Атеатр азы Анӡор Мықәба аҧсуа бызшәахьы еиҭеигеит апиесақәа: В. Петросиан «Ухьанҭоуп уара, Гиппократ ихылҧа», О.Иоселиани «Ауардын ааҳәаанӡа», М. Горки «Аҵыхәтәантәиқәа».
Анӡор Мықәба ирҿиамҭақәа: «Адгьыл агьама» (Апиесақәа). Аҟәа. 1988 ш.; «Мгәыӡ Ҳасан» (Ихыҭҳәаам ажәабжь). Аҟәа. 1999 ш.); «Гәашанеи» (Ажәабжь). Аҟәа. 2002 ш.; «Адгьыл зымпыҵаку аҭауадқәа» Аҟәа, 2005 ш.; «Иалкаау» (Адрамақәа, апиесақәа, аповестқәа). Аҟәа, 2012 ш.
