Аҟәа. Ԥхынҷкәынмза 2, 2021 шықәса. Аҧсныпресс. Имҩаҧысит аҳәынҭқарратә хықәкытә Программа «Анхарҭаҭыҧ-2022» ала анапхгарабжьаратә анагӡара-еиҿкааратә комиссиа аилатәара. Уи ахантәаҩра наигӡон аҧыза-министр ихантәаҩы Сергеи Пустовалов.
Акомиссиа аӡбамҭа ала 65-ҩык апретендентцәа рҟынтәи 31-ҩык алкаахеит, урҭ аҳәынҭқарра аҟынтәи ацхыраара рыҭахоит. Убас ала:
I агәыҧ иаҵанакуа аинвалидцәа – быжьҩык;
Ианыхәыҷыз аахыс аинвалидра змоуи ахәыҷы-аинвалид знапаҿы дыҟоу азыҳәамҭа алазҵази, - зынӡа жәахаҩык;
Хәҩык, ма инереиҳаны ахәыҷқәа змоу 11 инарзынаҧшуа аҭаацәарацәа.
Аҳәынҭқарратә хықәкытә программа «Анхарҭаҭыҧ–2021» жьҭаарамза 28, 2021 шықәсазы аминистрцәа Реилазаара аҿы ирыдыркылеит, анаҩс уи Аҳәынҭқарра Ахада ишьақәирӷәӷәеит.
2018 шықәсазы еиқәыршәан анаҩс ишьақәырӷәӷәан аҳәынҭқарратә нхарҭатә программақәа ҩба. Апрограмма «Хазы игоу акатегориақәа ирыҵанакука Аҧсны атәылауаа нхарҭаҭыҧла реиқәыршәара» ала хазы игоу акатегориақәа ирыҵанакуа ауааҧсыра анхарҭаҭыҧ аахәаразы ирхынҳәтәым аҧаратә хархәагақәа рыҭахон. Иарбоу апрограмма анагӡаразы хышықәса ирылагӡаны иазҧхьагәаҭан 30 млн. мааҭ рҟынӡа абиуџьеттә хархәагақәа. Аҩбатәи апрограмма «Анхарҭаҭыҧ–2019-2021 шш.» ала адҵаалара рылшон анхарҭаҭыҧ ала еиқәшәам зегьы, аха убри аан ацхыраара рыҭахон раҧхьаӡа иргыланы альготатә категориақәа ирыҵанакуа ауааҧсыра, убри аан иазоужьхо аҧаратә хархәагақәа аамҭак ашьҭахь хымҧада ирхынҳәтәуп. Ари апрограмма ала ирыхәаҧшит 54 зыҳәамҭа, урҭ рахьынтә иақәшаҳаҭхеит 42. Иара убас р рыла афинанстә цхыраара ҟаҵан.
Апрограмма «Анхарҭаҭыҧ–2022» аҿы аҩ-программак рресурсқәа еидырҵеит.
Апрограмма ҿыц ирхынҳәтәым аҧаратә хархәагақәа рыҭарала ишьаҭаркуп, уха убри аан ацхыраара роур алшоит мацара хазы игоу акатегориақәа ирыҵанакуа атәылауаа. Убас:
I агәыҧ иаҵанакуа аинвалидцәа,1992-1993 шш. Аҧсны Аџьынџьтәылатәи еибашьра I агәыҧ иаҵанакуа аинвалидцәагьы уахь иналаҵаны;
1992-1993 шш. Аҧсны Аџьынџьтәылатәи еибашьра аҿы иҭахаз рҭаацәа;
Рмаҵуратә уалҧшьа анагӡараан иҭахаз рҭаацәа, мамзаргьы урҭ азакәантә шьаҭала иреиҟаратәу хабарда ибжьаӡыз рҭаацәа;
Ауаҩы иҧсҭазаара, Аҧсны Аҳәынҭқарра амазара аиқәырхаразы, иара убас азинеиҿкаара ахьчареи рзы Аҧсны Аҳәынҭқарра атәылауаҩ иуалҧшьа анагӡараан иҭахаз рҭаацәа;
Хҩык, ма инареиҳаны ахәыҷқәа змоу аҭаацәарацәа;
Аинвалидра зауз, мамзаргьы данхәыҷыз нахыз аинвалидра змоу ахәыҷы знапы дану аҭаацәа;
Зани заби ҭахаз, мамзаргьы хабарда ибжьаӡыз ахәыҷқәа.
Инеиҧынкыланы имҩаҧысло акомиссиа аилатәарақәа реихшьаалақәа амассатә информациа ахаархәагақәа рҿы икьыҧхьхоит.
