Иҭахаз рыуацәеи рҭахцәеи, ауаажәларратә еилазаара алахәылацәа, аибашьра аветаранцәа, астудентцәа, ашколхәыҷқәа Ҭҟәарчал ақалақь, усҟан аҵәиԥрыга ахьыҵыԥрааз аҭыԥ аҿы ишьақәыргылоу абаҟа амҵан, Гәылрыԥшь араион, Лаҭа  ақыҭан аҵәиԥрыга ахькаҳаз аҭыԥ аҿы, Аҟәа ақалақь афырхацәа Рмемориал ахьыҟоу Ахьӡ-Аԥша апарк, иара убас иҭахаз анышә иахьамадоу Гәдоуҭатәи апарк ахь инеиуеит.

Ԥхынҷкәынмза 14, рзы атәыла Аиашахаҵаратә уахәамақәа зегьы рҿы ԥхынҷкәынмза 14, 1992 шықәса рзы иҟалаз Лаҭатәи атрагедиа аҿы иҭахаз зегьы рзы анцәаныҳәарақәа мҩаԥысуеит. Анцәаныҳәарақәа мҩаԥысуеит иара убас егьырҭ адинхаҵаратә культтә усбарҭақәа зегьы рҿы.

Ԥхынҷкәынмза 14 аԥсуа жәлар ҳаҟанаҵы ахааназы ҳҭоурыхтә гәалашәара аҿы хашҭра амамкәа инхо мшы еиқәаҵәоуп.

29 шықәса раԥхьа иҟалеит ҳаамҭазтәи Аԥсны аҭоурых аҿы зегьы раасҭа игәыҭшьаагоу ахҭыс. Ақырҭуа мпыҵахалыҩцәа амацәаз иҭакыз Ҭҟәарчал ақалақь аҟынтәи Гәдоуҭаҟа ауааԥсыра алазгоз аҵәиԥрыга Лаҭа ианахыԥраауаз гәымбылџьбарала иҭадырхеит. Уа иалаблит ҧҵ-ҩык ауаа – ахәыҷқәа, аҳәса, абыргцәа. Агәрагара уадаҩуп аҩажәатәи ашәышықәса анҵәамҭазы абри аҩыза агыгшәыгра згәаӷьуа ауаа адәы иқәуп ҳәа, аха  ҳаԥсадгьыл ҳамырхырц иҳақәлаз ампыҵахалаҩцәа иршаҭомыз ахәыҷқәагьы. 

Наунагӡа ргәалашәара ҳацзаауеит гәымбылџьбарала иҭадырхаз ҳауаажәлар.

Гәнаҳара змамыз амаалықьцәа ргәалашәара иҳаднаҵоит ари аҩыза ахлымӡаах уаҳа иҟамларц азы агәҽанызаара, еснагь ҳазхиазароуп ҳхәыҷқәа, ҳажәлар, ҳаԥсадгьыл рыхьчара.

Рыԥсқәа ҭынчзааит хара змамкәа иҭархаз ҳауаажәлар, ҳхырхәоит урҭ ргәалашәара аҿаԥхьа.