Аминистр иажәақәа рыла, Аԥснытәи ашколқәа  арҵагашәҟәқәа рыла реиқәыршәара аҿы ацхыраара ҟарҵоит Урыстәыла иреиҳаӡоу анапхгареи аҵара Аминистрреи рыдагьы, аекономикатә ҿиара Аминистрра, аҭыжьымҭа «Просвещение» ацхыраарала ари апроект еиҿызкааз Афонд «Русский мир».

Уи иара убас Аԥсны анапхгара, ахәҭакахьала афинансқәа Рминистрреи аекономика Аминистрреи аидара аагараҿы иҟарҵаз ацхыраара азы иҭабуп иҳәеит.

«Ҳара арҵагашәҟәқәа араионқәа рахь иҳашьҭхьеит: Гал араион – макьаназы инагӡаны шәҟәыла еиқәыршәаӡам, Ҭҟәарчал, Аҟәа, Гәылрыԥшь араионқәа инагӡаны еиқәыршәоуп. Ҳара Аҟәатәи ашколқәа шәҟәыла реиқәыршәара мҩаԥаагоит. Анаҩс Гагреи Гәдоуҭеи араионқәа еиқәыршәахоит», - ҳәа иҳәеит аминистр.

Уи иажәақәа рыла, Аминистрра 1-тәи - 7-тәи аклассқәа шәҟәыла реиқәыршәара алнаршоит.

Жәабранмзазы арҵага шәҟәқәа аҩбатәи апартиа аара ҳазыԥшуп - 8-тәи – 11-тәи  аклассқәа рҵаҩцәа рзы 100 нызықь екземплиар рҟынӡа инаӡо арҵагашәҟәқәа роуп.

Инал Габлиа иара убас иҟаиҵаз адыррақәа рыла,  урыстәылатәи рколлегацәа рыцхыраарала  иарбоу алитература еффективла ахархәара алыршара хықәкыс иҟаҵаны арҵаҩцәа рыквалификациа аизырҳара иазкны аметодикатә семинарқәа мҩаԥыслоит. «Есышықәса алитература маҷк иадамзаргьы аҽаԥсахуеит, уи акы ацлоит, акы агхоит, иҿыцу адҵақәеи аҽаршьцыларақәеи ацлоит. Убри зегьы ҳколлегацәеи ҳареи ҳасаб аҳҭоит.  Агәра ганы сыҟоуп, абри зегьы ҳҵарадырра аҩаӡара ашьҭыхра ишацхраауа», - ҳәа иҳәеит Инал Габлиа.