Раԥхьаӡа иргыланы аекономикатә ҿиара Аминистрра ахаҭарнакцәа Гагра ақалақь аҿы иҟоу ацрыҵмҩангагатә ӡхагаларатә станциа №4 арыцқьагатә шьақәыргылагақәеи еимаздо амагистралтә цәаҳәа аргылара шымҩаԥысуа гәарҭеит. Аӡымҩангага - 19 км рҟынӡа инаӡоит. Уажәазы ишьҭаҵоуп 7 800 метра аҟынӡа. Анаҩс урыстәылатәи аделегациа астанциаеиҵа «Бзыԥ» иаҭааит. Аекономикатә ҿиара Аминистрра аусзуҩцәа аобиект аҿы аусурақәа рцашьа гәарҭеит. Ари астанциеиҵа аиҭашьақәыргылара 2020-2022 шш. Аинвестициатә Программа ала иазԥхьагәаҭоуп, «Аԥсны афымцамч аперспективатә ҿиара Апрограмма» аҳәаақәа ирҭагӡаны имҩаԥысуеит. Астанциеиҵа аҿы имҩаԥысуа аусурақәа уи амчхара аизырҳара алдыршоит.
Гәдоуҭа араион аҿы аделегациа иалахәыз дырԥылеит Аԥсны Аихамҩа анапхгаҩы Арсоу Ҷыҭанаа. Урҭ еицны аихамҩақәыԥса ахәҭақәак ирҭааны рҭагылазаашьа гәарҭеит, шьаҭанкыла аиҭашьақәыргылара зҭахугьы уахь иналаҵаны.
Анаҩс аделегациа Аҟәаҟа, Аҳәынҭқарра Ахада иԥылара азы амҩа иқәлеит.