Аҟәа. Мшаԥымза 26, 2022 шықәса. Аԥсныпресс. Мшаԥымза 22- 24 рзы Ставрополь ақалақь аҿы 2007 – 2014 шш. рзы ииз арԥарцәа рыбжьара зхы иақәиҭу аиқәԥара азы иаарту атәылаҿацәтә турнир мҩаԥысуан.
Атурнир зынӡа рхы аладырхәит Краснодартәи атәылаҿацәи Нхыҵ-Кавкази рҟынтәи 150 – ҩык инарзынаԥшуа аспортсменцәа. Аԥснынтәи ари атурнир аҿы иқәгылеит Аҟәа ақалақь Ахадара аҿари аспорти русқәа рзы Аусбарҭа зхы иақәиҭу аиқәԥара асекциа ааӡамҭацәа. Урҭ атурнир аихшьаалақәа рыла, еиуеиԥшым аҩаӡара змоу 9 медалк раиура рҽаԥсартәит.
Зыкапантә категориа 38 кьыла рҟынӡа инаӡо рыбжьара актәи аҭыԥ ааникылеит Алан Қаԥба.
Аҩбатәи аҭыԥқәа ааныркылеит: Денис Џьопуа (ак/к - 42 кь), Алан Қаԥба (ак/к - 40 кь), Анри Шьакаиа (ак/к - 41 кь), Баграҭ Сақаниа (ак/к - 42 кь).
Атурнир аҿы аџьазтә медалқәа роуит: Тамерлан Тушаев (ак/к - 24 кь), Максим Бигәаа (ак/к - 28 кь), Данаҭ Попков (ак/к - 33 кь), Писирхан Магсудов (ак/к - 36 кь).
Аспортсменцәа азыҟарҵоит Ҭемыр Џьопуеи Ахра Ҵәыџьбеи.