Заанаҵтәи аусеилыргара ишышьақәнаргылаз ала, мшаԥымза 28, 2022 шықәса, 23 сааҭи 30 минуҭи инарзынаԥшуа, Очамчыра араион Тамшь ақыҭан, 1974 шықәса рзы ииз Шаматаа Вальтер Гәыгәын-иԥа, ҩыџьа-хҩык ацәгьоуцәа ицны, уажәазы ишьақәыргылам ахкы змоу автоматтә бџьарла еиқәных, акриптовалиута арҳара азы аппаратқәа рӷьычра хықәкыс иҟаҵаны, Раҵәба Ҭенгиз Иури-иԥа иҩны иақәлеит. Аҩны аԥшәма иҟынтәи аҿагылара анроу, ақәылаҩцәа уи иԥҟара иалагеит. Анаҩс иҟалаз аиҿахысраҿы изгашаз ахы рықәшәеит ақәылаҩцәа иреиуаз Шаматааи аҩны аԥшәма Раҵәба Ҭенгиз иашьа гәакьа – Раҵәба Ҭамази Иура-иԥа.
Иарбоу ацәгьоура иалахәыз ахаҿқәа зегьы реилкаареи раанкылареи азы зыԥшра амуа аусеилыргара-оперативтә уснагӡатәқәа зегьы мҩаԥысуеит.