Асеиԥш иҟоу акультурабжьаратә диалогқәа рылагалараз аԥшьгамҭақәа аполитикатә ҟазшьа рымоуп, Қырҭтәыла аиҳабыра рхықәкқәа, Аԥсны аганахь ала ирымоу аофициалтә программақәа ирықәшәоит. Абри инадҳәаланы Аԥсны Адәныҟатәи аусқәа рминистрра жәларбжьаратәи аиҿкаара «Амлакра аҿагылараз» апрограммақәа руак аусура ааннакыларц азы аӡбра аднакылеит ҳәа аанацҳауеит аусбарҭа аофициалтә саит.

2022 шықәса, мшаԥымза 8 азы Аԥсны Адәныҟатәи аусқәа Рминистрра аҿы Аԥсны аҵакыраҿы аус зуа жәларбжьаратәи аиҿкаарақәа рхаҭарнакцәа рԥылараан «Амлакра аҿагылараз» Аофис ахада Ервин Блау ишьақәирӷәӷәеит Аԥсны Адәныҟатәи аусқәа Рминистрра иамаз аинформациа – ари апроект аҳәаақәа ирҭагӡаны Аԥсни Қырҭтәылеи рҿар асеминарқәеи атренингқәеи рҿы онлаини офлаини аформатқәа рыла ишеиныруа.

Аинформациа ҭҵааны Аԥсны Аҳәынҭқарра аҵакыраҿы аҳәаанырцәтәи инапхгаратәым Жәларбжьаратәи аиҿкаарақәа рыпрограммақәа рынагӡараз аԥҟара апункт 4 ап.ҵ.4.5. напхгагас иҟаҵаны ари апроект аҿы иарбоу аԥшьгамҭақәеи ауснагӡатәқәеи ралмыршараз Аԥсны Адәныҟатәи аусқәа рминистрра апроект ареспубликаҿы аусура аанкылазарц азы аӡбра аднакылеит.

Абри аганахь ала ашәҟәы изынашьҭын «Амлакра аҿагылараз» Аофис ахада Ервин Блау.

Аԥсны Адәныҟатәи аусқәа Рминистрра ареспубликаҿы иҟоу Инапхгаратәым Аиҿкаарақәа (НПО) раартра апринципқәа аадырԥшларц ааԥхьара рзыҟарҵеит апроектқәа рынагӡараан, агуманитартә знеишьақәагьы рҳәаа иҭымҵларц азгәарҭеит.

Аԥсны адәныҟатәи аусқәа Рминистрра аринахысгьы қырҭтәылатәи астратегиатә усшәҟәқәеи аҿиара апрограммақәеи иарбоу Қырҭтәыла Анапхгара аполитика Аԥсны иахьаҵанакуа аларҵәара иазку апроектқәа рынагӡара азы аҽазышәарақәа рыԥхьырҟәҟәаара иазырхоу аусура ҭакԥхықәрала инанагӡалоит.