Аҟәа. Жәабранмза 22, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа иҟаиҵаз адҵа ала иахьа атәыла аԥыза-министр Алеқсандр Анқәаб Аҟәа ақалақь аҿы Донецктәии Лугансктәии Жәлартә Республикақәа рҟынтәи ахҵәацәа актәи агәыԥ рыдкылара азы аусуратә еилатәара мҩаԥигеит, ҳәа иаанацҳауеит Аԥсны аминистрцәа Реилазаара апресс-маҵзура.
Аилатәара рхы аладырхәит аԥыза-министр ихаҭыԥуаҩ Сергеи Пустовалов, иҷыдоу аҭагылазаашьақәа рзы аминистр Лев Кәыҵниа, атуристтә сасааирҭа «Аиҭар» Ҭемыр Адлеиба.
Аԥыза-министр иаауа ауаа, ҷыдала ахәыҷқәа рыбзазаратәии рмедицинатәии амаҵзура, рыкрыфара, рынхара, уҳәа ирыдҳәалоу азҵаарақәа зегьы ишахәҭоу ала аус рыдулара шхымԥадатәиу азгәеиҭеит.
Аԥсны Иҷыдоу аҭагылазаашьақәа рзы Аминистрреи атуризм Аминистрреи Донбасс аҟынтәи ахҵәацәа раагара аиҿкаара рнапы ианҵоуп.
Ахҵәацәа раагареи рнырхареи аиҿкаара знапы иану аусбарҭақәа зегьы русура акоординациа амҩаԥгара идҵоуп атәыла аԥыза-министр ихаҭыԥуаҩ Сергеи Пустовалов.